O ROMA: ETP phenel kaj džanel sar the kerel šukariben palo Romano problemos

ilustračné foto TASR

E šerutňi palo slovačiko gavarmentoske Iveta Radičova pro akada buťakero arakhiben rakinďa lava, savenca phenďa  kaj savore čahvores, savore manušes si hakaj pro šukar dživipen. Pal lakere lava mušinas the džanel savore kaj sam pro Slovačiko themi andral buteder kultura, kaj amen si sakones aver dživipnaskere dhikibena, kaj savore chaťaras savoro aver jakhenca prooda so hi importantno andro dživipen. „ Numa jekh si amen savoren jekhetano - džanas the dživel čak vašoda, kaj sam adaj jekhetane. Varesavo bilačhipen maškaro savore manuša save dživen andro Slovačiko si adaďives maškar amende the vašoda kaj nadžanas the avel tolerantno jekh prejakl avreste. Numa the vašoda kaj amen korkor akada kamas kaj the dživas kavke na jekhetane" dorakinďa zorale lavenca e šerutňi palo gavermentos.  

Efektivno dhikiben pal akada buťakero arakhiben sas oda kaj pes akada sikade vastestar chudle, čačikane štar dhikibena save kerena šukariben pro feder dživipen slovačiko Romenge. U akala dhikibena pes sikhavena pre edukacija/sikľarďipen/ pro sasťipen, pro bešipen the pre buťakere punktura. Kala pes rakinena pro Romane čore grupi save dživen pro istno thaj maškarado slovačiko themi. Oda so mušinela the kerel vaš akada o korkoro gavermentos palo lava save rakinďa e šerutňi Iveta Radičova „si oda kaj amen the keras savoro vašoda kaj the sikhavas lačho drom tumenge pašoda kana tumen kerena projektura „sivkerde pro manuša" pre ola Roma the gava kaj čačo bešen u phares dživen". Pre akada buťakero bešipen avne thaj o ministri Eugen Jurzyca, Zsolt Simon the o Jozsef Nagy.

E themeskeri šerutňi palo o ministerijum la buťake, palo socialno ažutipena the pale e famiľija SR e Lucia Nicholsonova andro peskero vakeriben phenďa pal aver the oda kaj jov si pre akada ačhaďi la organizacijaha ETP u kamel pes the joj mejk but the sikľol andre akadi agenda. Džanel the kerel učhariben palo but importantne hakaja pro socijalno dhikibena u akada šaj užarel the o ETP kaj kerela o ministerijum. „The pes nakerela šukar u but efektivno, čačikaňi buťi andro akala gava kaj bešen o Roma našťi doresaha varesavo šukareder ďives prejkal lengero romano dživipen phenďa e Nikolsonova. But, but love pes akadaj čorkerďa save pes kamne the rakinen andro romane tabora vašo manuša save odoj dživen, numa akala love ačhile andro žebi manušenge save pes čak kerenas hoj keren projektura prejkalo Roma, the vašoda akana imar nane but love pro oda kaj the keras mejk šukareder politika pre akadi agenda"  E raňi Nicholsonova peske gindinel u paťal o leske zorales kaj o „Komunitne centra - thana, khera" si but, but importanen prejaklo oda kaj pes the visarel o Romano dživipen andre kajse tabora u kampel akale centrenge the rakinel hakajenca varesave štandarti /so oda hi, so pes andre lende kampel the kerel, sar savi buťi.../. „ O love pre akala centri mušinel the garantinel pes andro themskeri lovakeri politika" dovakerďa e raňi Nicholsonova..

 E Gipsy Television kerela reportaža pal akada buťakero arakhiben , savo šaj dhikena andre relacija palo o nevipena savi pes vičinel Hiri. .