BI LAVESKERO IDEJO KARAČUTNO
ilustračné foto TASR
Paľikeras savorenge vaš oda kaj „phiren the dhikel, the te genel" pro amaro internetoskero portalis savoro so pes rakinel palo „romano dživipen". Paľikeras tumenge vašoda kaj hi tu men interesis pal akala romane dhikiňibena. Mangas savorenge tumenge šukar Karačoňa thaj bachtaľo Nevo berš 2011. The del tu men the tumare famiľijenge o guľo Deloro but bacht, sasťipen, kamiben thaj zor andro Nevo berš.
BI LAVESKERO IDEJO KARAČUTNO
Valaso uľol, valaso agorisaľel,
sar kamende avel bi laveskero idejo
karačutno.
Garude kherora andre parňi duhna,
pokerdi raňikori andro caklo ačhol.
Pre blaka čirikle darutnam
andro muja rakinen,
manušeskere tate burňika len temerel
namuken.
Ševelin patroro faďimen upruno,
tu so tut i balvaľ bistrerďa
pre agaca agurutno.
La parňa raťake ševelin o sune,
so čhavore romane nadžanen te
phenel.
Lengere sunore o daja phiraven,
lengere aťhora o sune garuven.
Andi rat peren ma trin čerheňa jivune,
nek le čhavorenge anen palek sune.
Bi laveskeri raťi, sentňi raťi, Ježiško tiknoro,
ke tute vazdel pe te kalo vastoro.
Te kale aťhora kamen bachtaľipen
ole pre rozdarutne vodiha.
Av ke lende bi laveskeri rat, Ježiško tiknoro,
thaj bacht ando kaštuno kheroro.
De lenge idejo kamiben, barvaľipen, lošaňiben,
ko kerďa erďavo, nek leske odmuken.
Nek ňiko novel korkoro, kamibnastar
ko kamiben diňa pre šuže jilestar.
I parňi duchnori tel peste garuďa
sa so sľa erďavo maškaro manuša.
Karačutni paramisi phenel so irinďa,
aven te šunkerel so mek jov naphenďa.
Valoso uľol, valaso agorisaľel,
sar kamende avel bi laveskero idejo karačutno.
E burňik so nadel - mer nane so te del -
rozpharavel pe tuke - o tato tut dela sar
o khamoro.
O jilo phenel : „Sa tuke odmuka"
lošanam užaras idejo karačutno šukar.
Ando čhavorutno amen anla palek čerheňori
jivutňi, o vodi amenge šužarla lakero parnipe.
Snaga suvjali, sagošno momeľi,
o momeľa ma phabon.
Kas kana našaďal avel gondolato - manuše so
sľa tuke pašek o idejo ľiľa, palek ma nadiňa,
ando gondolato sľal ande leskeri musi.
Avel nevo berš, oda tut domukľa,
so kerďal nalačham, te des pro lačhipe.
Ko tre sune kerla pro čačipen, kas hi ajsi zor?
Čit! Ma avel kamende -
bi laveskeri raťi - sentňi raťi.
