JAN FARKAŠ: Hi le slovačiko Romen kirajis?
foto Gipsy Television
Rimavsko Sobotate/Bratislava 11. Novemberis 2010 (Gipsy Television/Jozef Kmeťo) - "Sar save šegitipena dživipnastar man sas? Chunďom štar the jepaš berša, duj infarkti, miri romňi goďakero nasvalipen u čorkerde mandar cera 100 miliona koruni." Andro phundrado vakeriben prejkal Gipsy Television rakinel akala lava romano kirajis Jan Farkaš.
O romano kirajis vakerel kaj sas rakindo baripnaha le Romenca kaj pes the ačhel sar lengero kirajis, phenel kaj pes kada ačhiľa kana 15 manuša /šetutne khataro romane grupi/ leske rakinde o kirajipen pro šero andro vrama kan pes irinenas 90 berša. "Savore thode solacharipen prooda kaj pes ačhiľom kirajis vaš savore manuša - ROMA save dživen pre akadi luma. Savore dine cera 12 či ko 13 kilograma somnakaj, u akale somnakajestar pes kerde kirajakere klenota. „ prejkal Gipsy Televisijon phenďa o J. Farkaš. "Chudľom duj koruni save pes rakinen pro šejro, jekh bareder u jekh cikneder, o žeslos, phabaj, tabatierka thaj varesave angrusňa. Pre koruna si diajamanti, zafiri, rubini, smaragd, perla, si odoj jekhetnas cera 150 či ko 200 dragane bara, " dovakerel peskere lava o Romano kirajis. E Gipsy Televisijon manďa le Jan Farkašis, kaj le manušenge save dikhen pre internetoskeri romaňi televizija, kaj lenge the sikhavel o barvalipen, šukariben, dragane bara pal save vakerel, numa akala, sar kerahas akada reportos prejkal amari televizija nasne ke leste andro leskero kher.
O Jan Farkaš (65) si andro Rimaveskerosonbatenegero khotor them bud prindžardo manuš. Nakerel khanči varesavo garuvipen osleske kaj hi but barvalo Rom. Cera les šaj sas varekana 6 638 783,77 euri (200 miliona koruni). Andre vrama, ideos kana sas pro agor savoreske pes vozinelas andro peskero parno, baro motoris la značkaha Lincoln savo pes kerelas andro dujto khotor 70 beršenge thaj eršejno khotor 80 beršenge. Sas les cikňi ripilejva thaj peske poťinelas manušen (badigarden/ save viďazinenas , merkinelnas pre leste. O barvapilena - dragane bara pal save pes irinel upre andre akada iriben šaj aven avri so pro love pes dhikel cera 199 163,51 euri (6 milioni Sk).
Le Jan Farkašis hi andre Rimba Sombate baro kher (pandž štoki), savo cinďa le forestar vašo 1 659,7 euri (50.000,- Sk). Andre relacija Romano Dživipen, savi sako charno khotor vramatar imar dhikena the tumen, tumenge sikhavaha sar avri dhikel akada kher akana palo trin berša sar les o Farkaš cinďa. Ola so bešen andre akada kher si savore Roma. Došunena pes thaj oda so palo romano kirajis peske gindinen thaj vakren korkore o Roma.
Nek prindžardo kirajis vašo Roma sas o Florin Cioaba andral Rumunija. Uľila 17. Novemberiste andro berš 1954. Kerel peske baro šukariben pre voďi the pro jilo kaj les but Roma kamen sar peskere kirajis, u imar dochunďa thaj vrama kana les vaš peskere kirajiste thode the o Roma andral aver tehemi, internacijonalne themi kaj dživen o Roma. Nek bareder les vaš peskere kirajis rakinen o Roma andrale Rumunija. Le Florinos Cioabu sako šunel, hi les baro lav thaj zoraľipen maškaro Roma. Varesave lumakere themi leha rakinenas imar thaj varekeci vorbi, vakeribena sar manušeha, savo si čačo nek bareder šerutno, kirajis prejkalo Roma pre cali luma.
