ČECHIKO: Ejna andro gava the forova manuša save viďazinene/merkinena pro Roma? Agorutno lav pal akada perela palo 30 ďivesa.
foto novybydzov.cz
Hradcoste Kralove 18. januaris 2011 (Gipsy Television/Paulína Janová) - Foroskero urados andro Nove Bdžovo peske vašoda kaj o Roma keren bari bibacht taj naláčhipena kamen the poťinel manušen andral jekh agentura save pre lende kerena viďazipen - merkeripen. O foros mangel thaj aver gava the forova sven si kajse problemura le romeca kaj the keren jekhetaňi buťi pal akada nalačhiben. Pro jekhetano buťakero arakhipen pes o šerutne pal akala gava the forova vakerena 14 februaroste andro gav Novi Bidžov.
Pal jekh vakariben savo del o manuš savo kadaj bešel o Štefan Mitala pes dhikel akada but nalačho u nasikavel pes kaj si akada varesavo šukar zaučhardo drom. „ Pro oda, kana o manuša keren varesave nalačhibena mušinel the viďazinel - merkinel o šingune vaj foroskere šingune na varesave manuša andrale agentura, „ prejkal ČTK phenďa o Mitala, savo si maškar Roma baro vajdas u hi les zoralo lav. O love save kamel o foros the poťinel la agnenturake šaj feder the rakinel pro foroskere šingune. Phenďa the oda kaj andre phuri vrama sas buteder manuša save kerenas buťi sar foroskere šingune. dural vakerel kaj akala bilačhibena keren varesave terne Roma save nane kadarik u andro foros avne čak na čila. O phure Roma save adaj uline u dživen adj imar but berša kajse bilačhipena nakeren. No namišto si oda kaj o foros vakerel pal savore Roma jekh laveha u phenel ka kajso vareso keren savore." dothoďa akala lava.
Pre akada peske o foros vičinďa la egentura andrale Praha u vičinel pes Zenit. „ Amaro dovakeripen - e zmluva si kerďi pro jekh čhon, kana pes sikhavela sar savi lačhi buťi džanel the kerel akadi agentura" phenďa o Louda. Trin murša motoriha andrale agentura kerena peskeri buťi sako pintekos/paraštujin či ko agor kurkeske. Oda so dhikena sar savo nalčhiben pes andro foros kerela dena the džanel pal akada savoro le šingunenge. Trin kajse ďivesa moľa le foros pal akadi buťi 16.800 čechiko koruni, pro euri si oda 690. The pes akdi buťi sikhavela but šukar, šaj avela kaj le muršen ejla the rukono. Savore love keci mol ale foros akada savoro dhikel o šerutno forsoke pro jekh milionos koruni.
Kajsi situacija si andro Bydžovo imar jesostar phure beršestar. Andro čhon novemberiste o šeralo kana pes ačhine buteder kajse maribena the kana chudle jekha terňa 21 beršengera rakľa u kerde pre late džungalipen rakinďa zorale lava pro Roma maškaro manuša u mukľa buteder punktura pro oda kaj pes akada bilačhipen the zaačhavel. O foros kerďa napr. dhikibena pro herňi. Akana kerde thaj emajlovo adresa/pošta pre savi šaj sako elektronicko irinel the džanel palo varesave bilačhipena save pes keren andro foros. Pre peticija pes irinďa 3257 manuša save kamen kaj pes andro lengero foros the zaačhavel kajso bilačhipen savo keren o Roma. Bydžoviste dživel cca. 7000 manuša.
