GIPSY TELEVISION: Zaačhav banďaripen maškaro murša thaj džuvľa
foto Gipsy Television
Učhariben akale projektoske si sikhaviben pro banďaripen maškaro murša thaj džuvľa /džendros/. Pal o modelove dhikibena, keribena charne mozia /filmi kamel e Gipsy Televisijon the sikhavel pro banďaripen maškaro murša thaj džuvľa u akada pes ujol vašo stereotipi save hine andro marginalizimen the exkludikane Roma. /ajse manuša save dživen bud čores/ Akale projektoha kamel e romaňi inertnetoskeri televizija the dochudel oda kaj o manuša save dživen andro romane tabora the džanen so hi o banďaripen maškaro murša thaj džuvľa u sar kampel the kerel leskero cikňaripen.
O DVD - ečkos savo andre peste lidžel trin modelovo khelade scenki kerde hine andre amari romaňi čhib, analiza savi rakinďa the e expertka džala andro 200 komunitne thana, andro bejzutno sikhľarde thaj maškarutne sikhľarde andre Slovačiko themi. "E Gipsy Televisijon nakamel the avel čak varesavo informačno drom, numa kamel thaj the kerel sikľaripen, vašoda sam but lošale kaj pes amenge kerďa šukar zaučhariben la jekh orikaňi moziha palo bangaripen maškaro murša the džuvľa. Akadi amari gindura zaučharde thaj but prindžarde manuša," phenďa o šerutno direktoris khatare Gipsy Televisijon o Jozef Zeman. Le banďaripnaha maškar murša thaj džuvľa, so pes sikhavel sar jekhetano dhikiben pro murš the pre romňi pri rakinďa peskero goďaveripnaskero dhikiben thej e giľutňi Anita Soul, o klaviristas Richard Rikkon thaj o Igor Kmeťo terneder andralo Kmeťobend.
„ Akala trin akteri pes andre mozi/filmos sikhaven sar tutori „sikhľarde" andre jekh scenka u vakeren thaj romanes," dorakinel kala lava o Zeman. E dokumentarňi mozi /filmos „Zaačhav banďaripen maškaro murša thaj džuvľa /džendros" pes kerelas trin čhona. Šerutne aktera andro scenki pes le manušenge sikhavnena mujenca khatare Gipsy Televisijon, o moderatoris palo o importantne nevipena - hirišaga andre relacija Hiri, o Peter Pollák vaj o redaktoris palo hirišaga o Emil Balog. „Numa the kamľam kaj amare Roma pes the zarakinen ke akada jileha thaj goďaha u savoro the achaľuven, o scenki kerďam amara romaňaha čhibaha" Akala scenki hi kerde thaj slovačiko titulkenca, " rakinel lava pro čačikano drom o šerutno direktoris khatare Gipsy Televisijon o Jozef Zeman. O filmos pes kerďa palo lovakero ažutipen, šegitipen khataro Slovačiko gavermentos pašo buťakero drom savo kamel the phagerel savore dhikibena, keribena pale e diskriminacija, rasizmos, xenofobija, antisemitizmos the aver bibachtaľipena save pes keren pro manuša.
